ເດັກໄອທີໂປຼເຈັກ໌

16 June 2021

🚫 ລືມລະຫັດຜ່ານ Facebook ຈະຕ້ອງເຮັດແນວໃດ ?

08 July 2018

ຮຽນຈົບ ມ7 ແລ້ວ ຈະເລືອກຮຽນຕໍ່ສາຍໃດດີ ?

ເລື່ອງມັນມີຢູ່ວ່າ : ກ່ອນໜ້ານີ້ດົນນານມາແລ້ວແຫຼະ, ດົນຈົນຂ້ອຍເອງກໍ່ບໍ່ຈື່ລະວ່າແມ່ນເລື່ອງຫຍັງ…555+

ມະ…ເຂົ້າເລື່ອງເນາະ *_^ ( ຂໍອະນຸຍາດແທນໂຕເອງວ່າອ້າຍເດີ້ )

ເລື່ອງມີຢູ່ວ່າ ໄດ້ມີນ້ອງໆທີ່ຫາກໍ່ຈົບມາໃໝ່ໆໄດ້ຖາມວ່າ ຮຽນຈົບ ມ7ແລ້ວ ນ້ອງຄວນຈະໄປຮຽນຕໍ່ຫຍັງດີອ້າຍ ? ຮຽນຢູ່ຄະນະໃດດີອ້າຍ ? ແລ້ວຮຽນຍາກບໍອ້າຍ ? …

//ງຽບຢູ່ 2ວິ ແລ້ວຄິດໃນໃຈ “ຂະໜາດນ້ອງເອງຍັງບໍ່ຮູ້ວ່ານ້ອງຢາກຮຽນຫຍັງ ລະອ້າຍຊິຮູ້ບໍນ້ອງ ຮ່າຮ່າ”

ບອກເລີຍ ! ວ່າບໍ່ແມ່ນເລື່ອງແປກເນາະ ທີ່ນ້ອງໆຈະຍັງບໍ່ຮູ້ວ່າຕົນເອງມັກຫຍັງ ? ແລ້ວຈະເລືອກຮຽນຫຍັງ ? ນີ້ແຫລະ #ຄົນຈິງ2018

ເຊິ່ງອ້າຍກໍ່ເປັນຄືກັນ, ຊ່ວງອ້າຍຈົບໃໝ່ໆ ສະໄໝ 6ປີຫຼັງ(ກະບໍ່ໄດ້ດົນປານໃດເນາະ) ກ່ອນທີ່ອ້າຍຈະເລືອກຮຽນໄອທີ ກໍ່ເພາະວ່າໄດ້ມີລຸ້ນເອື້ອຍທີ່ຢູ່ບ້ານດຽວກັນໄດ້ຮຽນ ແລ້ວຮູ້ສຶກວ່າ…ອືມ ມັນນ່າຈະເທ່ດີແຫຼະ ກໍ່ເລີຍຕັດສິນໃຈມາຮຽນ ໂດຍທີ່ບໍ່ຮູ້ເລີຍວ່າມັນແມ່ນຫຍັງ ແລ້ວຮຽນກ່ຽວກັບຫຍັງວະ ຮະຮະ, ຂະໜາດຟັງແຕ່ຊື່ມັນກໍ່ຍັງເມື່ອຍກ່ອນລະ “ອິດ”- IT , ແຕ່ເມື່ອໄດ້ມາເລີ່ມຮຽນຈິງຈັງ ກໍ່ເຮັດໃຫ້ຮູ້ເຖິງຊີວິດນັກສຶກສາຫຼາຍຂຶ້ນ ແລະ ອ້າຍກໍ່ໄດ້ຮັກໄອທີຕັ້ງແຕ່ນັ້ນມາ 😍( ໄວ້ມີໂອກາດຈະມາຂຽນກ່ຽວກັບຊີວິດໃນຮົ້ວຕານ່າງໃຫ້ອ່ານ)

ດຽວເຮົາກັບມາເລື່ອງທີ່ນ້ອງໆໄດ້ຖາມໄວ້ເນາະວ່າ :

ຄວນຈະເລືອກຮຽນສາຍໃດດີ ? ຄະນະໃດດີ ?

ເຊື່ອວ່ານີ້ເປັນຄໍາຖາມໂລກແຕກ ສໍາລັບນ້ອງໆຫຼາຍຄົນທີ່ກໍາລັງຢູ່ໃນຊ່ວງຕັດສິນໃຈວ່າຈະເລືອກຮຽນສາຍໃດດີ ແລ້ວຮຽນຄະນະໃດດີຈຶ່ງຈະເໝາະສົມກັບເຮົາ ເຊິ່ງ

ບາງຄົນກໍ່ອາດຈະເລືອກຮຽນຕາມທີ່ອ້າຍ, ເອື້ອຍແນະນຳເລີຍ
ບາງຄົນກໍ່ອາດຈະເລືອກຮຽນຕາມທີ່ພໍ່ແມ່ຢາກໃຫ້ມາຮຽນ
ບາງຄົນກໍ່ອາດຈະເຫັນໝູ່ຈະຮຽນ ກໍ່ເລີຍຈະຮຽນນໍາໝູ່
ບາງຄົນກໍ່ອາດຈະເລືອກຍ້ອນເຫັນລຸ່ນອ້າຍຫຼໍ່
ບາງຄົນກໍ່ອາດຈະເລືອກຍ້ອນມີລຸ່ນເອື້ອຍງາມ
ບາງຄົນກໍ່ອາດຈະເລືອກຮຽນເພາະຄ່າເທີມຖືກ
ບາງຄົນກໍ່ອາດຈະເລືອກຮຽນເພາະມັນນ່າຈະເທ່ດີ
ບາງຄົນອາດຈະເລືອກມາຮຽນຍ້ອນ ເສກ ໂລໂຊ … ເພາະວ່າ ( ໃຈສັ່ງມາ )

Oop… !

ເຊິ່ງອ້າຍເຊື່ອວ່າ ນ້ອງໆແຕ່ລະຄົນຈະມີເຫດຜົນໃນການເລືອກສາຍຮຽນໃນຮູບແບບຂອງໃຜລາວເນາະ !

ສະນັ້ນ : ກ່ອນທີ່ນ້ອງໆຈະຕັດສິນໃຈເລືອກສາຍຮຽນ ອ້າຍຢາກໃຫ້ນ້ອງໆລອງຈິນຕະນາການໄປເລີຍວ່າ “ ເມື່ອນ້ອງໆຮຽນຈົບແລ້ວ ນ້ອງຢາກຈະເຮັດວຽກກ່ຽວກັບຫຍັງ ແລ້ວເຮັດວຽກແບບໃດ ” ຄ້າຍໆກັບຄວາມຝັນທີ່ນ້ອງໆຢາກເປັນຫັ່ນລະ

//ອ່ານມາລະຄືແປກໆແມ່ນບໍ ? … ຖາມເລື່ອງການເລືອກສາຍຮຽນ ພັດມາບອກໃຫ້ໄປເລືອກສາຍວຽກ ຫະຫະ*

| ແຕ່, ມັນຈະດີເດີ້ ຖ້ານ້ອງໆຮູ້ເລີຍວ່າ ເມື່ອນ້ອງໆຈົບມານ້ອງຢາກຈະເຮັດວຽກແບບໃດ ເຊິ່ງມັນຈະຊ່ວຍໃຫ້ນ້ອງຕັດສິນໃຈເລືອກສາຍຮຽນໄດ້ຫຼາຍຂຶ້ນ ເຊັ່ນສົມມຸດ :

ຖ້ານ້ອງຢາກເຮັດວຽກກັບທະນາຄານ : ນ້ອງກະໄປຊອກສາຍຮຽນເລີຍ ວ່າມີຢູ່ໃສແດ່ທີ່ຈະໄດ້ຮຽນກ່ຽວກັບວຽກການທະນາຄານ
ຖ້ານ້ອງຢາກເປັນເຈົ້າຂອງທຸລະກິດ : ໄປຊອກຫາຂໍ້ມູນເລີຍ ວ່າຈະຮຽນສາຍໃດຈຶ່ງຈະສາມາດພັດທະນາທັກສະຕົນເອງໃຫ້ໄປສູ່ນັກທຸລະກິດໄດ້
ຖ້ານ້ອງຢາກເປັນນັກອອກແບບ ( Designer ): ກໍ່ລອງໄປຊອກສາຍທີ່ໄດ້ຮຽນກ່ຽວກັບການອອກແບບເລີຍ
ແຕ່ຖ້ານ້ອງໆຢາກເປັນ iRon Man : ອັນນີ້ຕ້ອງໄປຖາມ Tony Stark ເອົາເອງເດີ້…555+

ສະຫຼຸບ : ແຕ່ລະສາຍຮຽນ ກໍ່ຈະມີຄວາມສໍາຄັນທີ່ແຕກຕ່າງກັນອອກໄປ, ເຊິ່ງມັນຂຶ້ນກັບວ່າເຮົາຢາກຈະໄດ້ວິຊາອາຊີບແບບໃດ, ແນວທາງການໃຊ້ຊີວິດແບບໃດເພື່ອມາພັດທະນາຕົນເອງໃນອະນາຄົດທີ່ສົດໃສຂອງເຮົາ.

ຈາກຄໍາຖາມຂ້າງເທິງ : ຖ້າຫາກວ່ານ້ອງຮູ້ແລ້ວວ່າຢາກເຮັດວຽກຫຍັງ ແລ້ວນ້ອງຈະສາມາດຫາຂໍ້ມູນກ່ຽວກັບສາຍຮຽນນັ້ນໄດ້ຢູ່ໃສ ?

ເຊິ່ງໄດ້ຂ່າວມາວ່າກໍາລັງຈະມີ “ງານມະຫາກໍາເປີດກວ້າງການສຶກສາ” ທີ່ໃກ້ຈະມາຮອດນີ້ ເຊິ່ງນ້ອງໆສາມາດໄປສອບຖາມຂໍ້ມູນກ່ຽວກັບສາຍການຮຽນຕ່າງໆຢູ່ໃນງານນີ້ໄດ້ເລີຍ

“ສຸດທ້າຍນີ້ ອ້າຍຂໍໃຫ້ນ້ອງໆທຸກຄົນ ໄດ້ເຂົ້າຮຽນຢູ່ຄະນະທີ່ນ້ອງໆໄດ້ເລືອກ ແລະ ສາຂາທີ່ນ້ອງມັກເດີ້ , ຕັດສິນໃຈໃຫ້ດີ 4ປີ ໃນຊີວິດນັກສຶກສາ ບໍ່ແມ່ນເລື່ອງງ່າຍ ແລະ ກໍ່ບໍ່ແມ່ນເລື່ອງຍາກເຊັ່ນດຽວກັນ, ແລ້ວນ້ອງໆຈະເຂົ້າໃຈເອງເນາະວ່າ…”

ປລ. ນີ້ກໍ່ເປັນພຽງຄໍາແນະນໍາ ຈາກຄວາມຄິດສ່ວນຕົວລ້ວນໆ ເຊິ່ງອ້າຍຫວັງວ່າມັນຈະຊ່ວຍໃຫ້ນ້ອງໆໄດ້ໃຊ້ຕັດສິນໃຈໃນການເລືອກສາຍຮຽນບໍ່ໜ້ອຍກໍ່ຫຼາຍເນາະ *_^

IRON MAC

ດ້ວຍຄວາມເຄົາລົບ ແລະ ຮັກແພງ

#DEKIT_PROJECT #GraphixD #iRonMac

”FaceApp“ ປ່ຽນໜ້າເຊັງໆ ໃຫ້ເປັນໜ້າຍິ້ມໄດ້ ດ້ວຍວິທີງ້າຍງ່າຍ !

“FaceApp” ເປັນແອັບຯສໍາລັບຄົນທີ່ບໍ່ຄ່ອຍມັກຍິ້ມໂດຍສະເພາະເລີຍ, “FaceApp” ສາມາດປ່ຽນໜ້າເຊັງໆ ໃຫ້ເປັນໜ້າຍິ້ມແຍ້ມ ຫຼື ໜ້າເດັກນ້ອຍ, ໜ້າຕອນເຖັ້າ, ໜ້າມີໜວດ ແລະ ອີກຫຼາຍໆໜ້າໃຫ້ເຮົາໄດ້ເລືອກໃຊ້ກັນຢ່າງເມົາມັນ *_^

ສໍາລັບ “FaceApp” ເປັນແອັບຯຟຣີ ເຊິ່ງສາມາດໃຊ້ໄດ້ກັບລະບົບ iOS ແລະ Android, ເດັກນ້ອຍໃຊ້ກໍ່ໄດ້-ຜູ້ໃຫຍ່ໃຊ້ກໍ່ດີເນີ້ແອັບຯນີ້.

ກ່ອນອື່ນເຮົາມາຕິດຕັ້ງແອັບຯກ່ອນເລີຍ ສາມາດກົດທີ່ປຸ່ມດາວໂຫຼດກ້ອງຮູບນີ້ເລີຍ

ຫຼັງຈາກທີ່ເຮົາດາວໂຫຼດແອັບຯມາແລ້ວ ກໍ່ໃຫ້ເປີດແອັບຯຂຶ້ນມາ ເຊິ່ງໃນສ່ວນຂອງແອັບມັນຈະໃຫ້ເຮົາເລືອກຮູບ ເຊິ່ງສາມາດຖ່າຍເຊວຟີ່ເອົາໜ້າເຮົາໄດ້ເລີຍ ຫຼື ຈະເລືອກເອົາຮູບທີ່ເຮົາເຄີຍຖ່າຍໄວ້ກ່ອນໜ້າກໍ່ໄດ້ (ແນະນໍາວ່າຮູບທີ່ຈະໃຊ້ແຕ່ງ ຄວນເປັນຮູບໜ້າຊື່ເດີ້…)

2. ເມື່ອໄດ້ຮູບທີ່ຕ້ອງການແລ້ວ ແອັບຯຈະໃຊ້ເວລາປະມວນຜົນປະມານ 2ວິ ຈາກນັ້ນຈະສະແດງຮູບທີ່ເຮົາເລືອກພ້ອມກັບສະແດງອິໂມຈິ 😁 🤓😎🧔🏼 ໃຫ້ເຮົາເລືອກໃຊ້ໄດ້ເລີຍ, ເມື່ອເຮົາກົດທີ່ອິໂມຈິ ໃດ ຮູບຂອງເຮົາກໍ່ຈະປ່ຽນໄປຕາມອິໂມຈິທີ່ເຮົາເລືອກ.

ຕົວຢ່າງ : ເຮົາກົດທີ່ 😄(Smile) ຮູບຂອງເຮົາກໍ່ຈະຍິ້ມຄືກັບອິໂມຈິແບບອັດຕະໂນມັດເລີຍ

ນອກຈາກອິໂມຈິໃນແບບອື່ນແລ້ວ ຍັງມີອິໂມຈິທີ່ເຮັດໃຫ້ໜ້າເຖົ້າ, ໜ້າເດັກນ້ອຍ, ປ່ຽນຈາກໜ້າຜູ້ຊາຍເປັນໜ້າຜູ້ຍິງໄດ້ ແລະ ປ່ຽນຈາກໜ້າຜູ້ຍິງເປັນຊາຍໄດ້, ສາມາດສ້າງເປັນ 4ຮູບພ້ອມກັນໄດ້ ກົດທີ່ “Collage” ແລ້ວເລືອກແຕ່ງຮູບໄດ້ເລີຍ

ສາມາດເຮັດເປັນຮູບປຽບທຽບ ໂດຍການກົດທີ່ “Duo” ລວມໄປເຖິງການສ້າງພາບໃຫ້ໄປເປັນ Gif ໂດຍການກົດທີ່ “Gif”

ລອງເອົາໄປໃຊ້ເບິ່ງເນາະ ຮັບຮອງວ່າມີຄວາມສຸກ ຫະຫະ

21 September 2017

Apple ໄດ້ປ່ອຍ iOS 11 ໃຫ້ອັບເດດແລ້ວ ພ້ອມກັບລູກຫຼີ້ນທີ່ເຈ໋ງໆ ມີຫຍັງແດ່ ? ແລະ ອຸປະກອນໃດແດ່ທີ່ຮອງຮັບ iOS 11 ?

Apple ໄດ້ປ່ອຍ iOS 11 ໃຫ້ອັບເດດຢ່າງເປັນທາງການ ທີ່ມາພ້ອມກັບລູກຫຼີ້ນໃໝ່ໆ ເຈ໋ງໆ ດັ່ງຕໍ່ໄປນີ້ :

ການອອກແບບໃໝ່ ( Design Change )

ທີ່ເຮົາອາດຈະເຄີຍເຫັນຄ່າວໆກ່ອນໜ້ານີ້ແລ້ວ ໃນການປັບປ່ຽນໜ້າຕາຂອງ iOS 11 ທີ່ໄດ້ປ່ອຍໃຫ້ທົດລອງໃຊ້ ໃນເວີຊັ່ນທົດລອງ ແລະ ມື້ນີ້ເຮົາມາເບິ່ງໃນເວີຊັ່ນເຕັມ ວ່າມີຫຍັງປ່ຽນແປງແດ່

1. Control Center

ນັບໄດ້ວ່າເປັນການປ່ຽນແປງທີ່ເຈ໋ງຫຼາຍ ທີ່ເຮັດໃຫ້ເຮົາສາມາດຕັ້ງຄ່າ ຫຼື ຈັດການປຸ່ມຄວບຄຸມຕ່າງໆເຮັດໃຫ້ເຮົາໃຊ້ງານໄດ້ງ່າຍຂຶ້ນ ແລະ ສະດວກຫຼາຍຂຶ້ນ ຢ່າງເຊັ່ນ :

ປຸ່ມເປີດ-ປິດ Cellular ( ແຕ່ກ່ອນຕ້ອງເຂົ້າຕັ້ງຄ່າທຸກຄັ້ງເພື່ອເປີດ-ປິດ )

ປຸ່ມ Guided Access

ປຸ່ມ ຫ້າມລົບກວນໃນຂະນະຂັບລົດ

ປຸ່ມປັບແສງ-ສຽງ

ແລະ ທີ່ເຈ໋ງໄປກວ່ານັ້ນ ໄດ້ເພີ່ມປຸ່ມບັນທຶກວີດີໂອໜ້າຈໍໄດ້ອີກ ຫຸຫຸ (ເຊິ່ງໃນເວີຊັ່ນກ່ອນຈະຕ້ອງໄດ້ລົງ Software ເພື່ອບັນທຶກວີດີໂອໜ້າຈໍ ) ແລະ ລວມທັງປຸ່ມຄວບຄຸມຕ່າງໆ ໂດຍທີ່ເຮົາບໍ່ຈໍາເປັນຕ້ອງເຂົ້າການຕັ້ງຄ່າທຸກຄັ້ງ

ເຊິ່ງເຮົາສາມາດຈັດການກັບປຸ່ມຄວບຄຸມຕ່າງໆໄດ້ອີກ ໂດຍເຂົ້າໄປທີ່

Settings > Control Center > Customize Controls

// ເຮົາສາມາດ ເພີ່ມ-ລົບປຸ່ມຄວບຄຸມຕ່າງໆໄດ້ຕາມຕ້ອງການ

2. Notification ( ໜ້າຈໍ Lock Screen )

ໄດ້ມີການລວມໜ້າຈໍ Lock Screen ກັບລະບົບແຈ້ງເຕືອນ Notification ໄວ້ນໍາກັນ ( ເຊິ່ງເວີຊັ່ນກ່ອນແມ່ນຈະມີການແຍກອອກຈາກກັນ ) ເຊິ່ງເຮົາສາມາດເຂົ້າເຖິງ ລະບົບແຈ້ງເຕືອນ Notification ໄດ້ຈາກການກົດສະໄລ້ລົງ ແລະ ເຂົ້າເຖິງ Widget ຕ່າງໆ ໂດຍການປັດໄປທາງດ້ານຂວາ ແລະ ປັດໄປດ້ານຊ້າຍເພື່ອນເຂົ້າກ້ອງຖ່າຍຮູບໄດ້ປົກກະຕິ

3. ໜ້າຈໍ Passcode ແລະ Keypad ແບບໃໝ່

ໜ້າຈໍສໍາລັບໃສ່ລະຫັດຜ່ານ Passcode ກໍ່ໄດ້ມີການປັບປ່ຽນໃຫ້ເປັນປຸ່ມກົດແບບວົງມົນສີເທົາ ( ໃນແບບກ່ອນແມ່ນຈະເປັນວົງມົນແບບມີຂອບ ) ແລະ ລວມໄປເຖິງປຸ່ມກົດໂທອອກກໍ່ໄດ້ປ່ຽນຄືກັບ Passcode

4. ຮູບແບບ Icon ໃໝ່

ໄດ້ມີການປ່ຽນຮູບແບບ Icon ຂອງແອັບຯພື້ນຖານທີ່ຕິດມາກັບເຄື່ອງບາງແອັບຯ ເຊັ່ນ : Camera, App Store, Calculator ແລະ Contact ເປັນຕົ້ນ

5. Dock ໃນໜ້າ Home

ຈະສາມາດສັງເກດເຫັນວ່າ iOS 11 ຈະຕັດຊື່ແອັບຯ ທີ່ຢູ່ໃນ Dock ອອກ

6. ປັບປ່ຽນ Font ແລະ ປັບປຸງໜ້າ Setting ໃໝ່

ໄດ້ມີການປັບປ່ຽນ Font ໃຫ້ໜາຂຶ້ນເລັກນ້ອຍ ເພື່ອຄວາມເຂັ້ມຂອງຕົວອັກສອນ ເຊິ່ງເຮົາສາມາດສັງເກດໄດ້ຈາກຊື່ແອັບຯ ແລະ ໜ້າການຕັ້ງຄ່າ Setting ທີ່ໄດ້ມີການເພີ່ມຫົວຂໍ້ໜາໆດ້ານເທິງ ນອກນັ້ນ, ຍັງໄດ້ຈັດເມນູ ແລະ ລູກຫຼີ້ນໃຫ້ຢູ່ເປັນກຸ່ມດຽວກັນ ເພື່ອຄວາມເປັນລະບຽບຫຼາຍຂຶ້ນ

7. ການໃຊ້ງານ Smooth ຂຶ້ນ

ໃນການໃຊ້ງານຕ່າງໆ ໄດ້ມີການປັບຄວາມ Smooth (ເລື່ອນໄຫຼ - ໄຫຼເລື່ອນ ຫະຫະ) ຢ່າງເຊັ່ນ : ເວລາເປີດໃຊ້ງານແອັບຕ່າງໆ, ການສະຫຼັບໜ້າຈໍໄປມາ ລວມເຖິງການປົດລ໋ອກໜ້າຈໍ

ວີດີໂອ : ການໃຊ້ງານ Smooth ຂຶ້ນ

8. Screen Video Recording

ເຊິ່ງເປັນອີກລູກຫຼີ້ນໜຶ່ງທີ່ໜ້າສົນໃຈຫຼາຍ ທີ່ເຮັດໃຫ້ເຮົາສາມາດບັນທຶກວີດີໂອໜ້າຈໍໂທລະສັບ, ບໍ່ວ່າຈະບັນທຶກຕອນຫຼີ້ນເກມກໍ່ສາມາດບັນທຶກໄດ້ງ່າຍໆເລີຍ ( ໃນເວີຊັ່ນກ່ອນໆແມ່ນຕ້ອງໄດ້ຕິດຕັ້ງ Software ເພີ່ມ ຈິ່ງຈະສາມາດບັນທຶກໄດ້)

9. ໜ້າແອັບຯ Calculator ປັບໜ້າຕາໃໝ່

ໄດ້ມີການປັບປ່ຽນ Icon ໃໝ່ ທີ່ເປັນປຸ່ມແບບວົງມົນ

10. ເພີ່ມແອັບຯຈັດການໄຟລ໌ Files ໃໝ່ເຂົ້າມາ

Apple ໄດ້ເພີ່ມແອັບຯ Files ເຂົ້າມາແທນແອັບຯ iCloud Drive ເພື່ອເຮັດໃຫ້ການໃຊ້ງານສະດວກຂຶ້ນ ແລະ ເພື່ອຈັດລະບຽບຂໍ້ມູນໃຫ້ເປັນລະບຽບຂຶ້ນ, ລວມເຖິງການຈັດການໄຟລ໌, ການສ້າງ Folder ແລະ ທີ່ເຈ໋ງໄປກວ່ານັ້ນຄື ຮອງຮັບການລາກວາງ Drag & Drop ໄດ້ອີກ ( ໃຊ້ກັບເຄື່ອງ iPad ) ແລະ ຍັງສາມາດໃຊ້ງານຮ່ວມກັບ iCloud Drive (ເຊິ່ງແອັບຯ Files ຈະໃຊ້ງານຄ້າຍໆກັບແອັບຯ Finder ໃນເຄື່ອງ Mac )

11. ເປີດໃຊ້ງານຟັງຊັ່ນ Type to Siri ເພື່ອພິມຂໍ້ຄວາມສົນທະນາກັບ Siri

Siri ໃນ iOS 11 ໄດ້ເພີ່ມຟັງຊັ່ນ Type to Siri ເຂົ້າມາ ເມື່ອເຮົາເປີດໃຊ້ງານແລ້ວ ຈະຊ່ວຍໃຫ້ເຮົາສາມາດພິມບົດສົນທະນາ ແລະ ສັ່ງໃຫ້ Siri ເຮັດບາງຢ່າງໃນແບບທີ່ເປັນຂໍ້ຄວາມໄດ້

ໂດຍສາມາດເຂົ້າໄປຕັ້ງຄ່າໄດ້ທີ່

Settings >General > Accessibility > Siri > Type to Siri

12. Photos

ລະບົບຈື່ຈໍາໃບໜ້າ (Facial Recognition) ທີ່ສາມາດກວດສອບໃບໜ້າຂອງເຮົາໃນຮູບພາບໄດ້ ແລະ ແຍກຮູບຂອງຄົນໃນຮູບພາບເກັບໄວ້ເປັນແຕ່ລະຮູບ

ວີດີໂອ : Photo

13. Emergency SOS

iOS 11 ໄດ້ເພີ່ມຟີດເຈີ Emergency SOS ເຂົ້າມາໃໝ່ເພື່ອເປັນຕົວເລືອກໃນການໂທອອກສຸກເສີນ ເມື່ອເຮົາເປີດໃຊ້ງານ Auto Call ແລ້ວ ເຮົາສາມາດກົດປຸ່ມລ໋ອກໜ້າຈໍດ້ານຂ້າງ ຈໍານວນ 5 ຄັ້ງ ເພື່ອໂທອອກຫາເບີສຸກເສີນທີ່ເຮົາກໍານົດໄວ້ ແລະ ກົດປຸ່ມລ໋ອກໜ້າຈໍດ້ານຂ້າງອີກ 5 ຄັ້ງເພື່ອປິດໃຊ້ງານ

ສາມາດເຂົ້າຕັ້ງຄ່າທີ່

Settings > Emergency SOS > Auto Call > ปรับเป็น On

14. ແອັບຯ Camera ສາມາດສະແກນ QR Code ໄດ້

ແອັບຯ Camera ສາມາດສະແກນ QR Code ໄດ້ເລີຍ ໂດຍບໍ່ຕ້ອງລົງແອັບຯເພີ່ມເລີຍ ( ເຊິ່ງເປັນຟັງຊັ່ນທີ່ເຈ໋ງຫຼາຍ ) ແລະ ຍັງສາມາດເຂົ້າເຖິງລິ້ງທີ່ເຮົາສະແກນໄດ້ເລີຍ

15. ເມນູ Shut Down

ເປັນເມນູທີ່ສ້າງຂຶ້ນມາເພື່ອໃຊ້ໃນກໍລະນີ ປຸ່ມ Power ບໍ່ເປັນ ( ມັນອາດຈະຈໍາໃນເປັນບາງເຮົາຕ້ອງໄດ້ໃຊ້ )
ສາມາດເປີດໃຊ້ງານທີ່

Settings > General > Shut Down

16. ການຖ່າຍພາບໜ້າຈໍ Screenshot

ເມື່ອເຮົາຖ່າຍພາບໜ້າຈໍ Screenshot ແລ້ວລະບົບຈະສະແດງຮູບພາບຂະໜາດນ້ອຍຢູ່ດ້ານລຸ່ມ - ຊ້າຍຂອງໜ້າຈໍ ແລະ ເມື່ອເຮົາກົດລົງທີ່ຮູບພາບ ເຮົາກໍ່ຈະສາມາດແກ້ໄຂຮູບພາບກ່ອນ ແລ້ວກໍ່ສາມາດບັນທຶກໄວ້

17. ແອັບຯ Photo ສາມາດເປີດໄຟລ໌ Gif ໄດ້ແລ້ວ

iOS 11 ສາມາດເປີດໄຟລ໌ທີ່ເປັນ Gif ໄດ້ປົກກະຕິ ເຊິ່ງຖ້າທຽບໃສ່ເວີຊັ່ນກ່ອນນີ້ແມ່ນບໍ່ສາມາດເປີດໄຟລ໌ທີ່ເປັນ Gif ໄດ້

ຈາກທີ່ໄດ້ລອງ Updated ແລ້ວເຫັນວ່າມີລູກຫຼີ້ນເພີ່ມຂຶ້ນຫຼາຍ, ແນະນໍາໃຫ້ອັບເດດເລີຍ

----------------------

ວິທີການອັບເດດ

ວິທີການອັບເດດດ້ວຍຕົນເອງກໍ່ງ່າຍໆເລີຍ

Settings > General > Software Update

// ກ່ອນທີ່ຈະອັບເດດ ຢ່າລືມເຊື່ອມຕໍ່ Wifi ເພື່ອອັບເດດ ແລະ ກວດສອບອຸປະກອນທ່ານວ່າຮອງຮັບ iOS 11 ຫຼື ບໍ

-----------------------------------------------------------

ອຸປະກອນທີ່ຮອງຮັບ iOS 11

ຂອບໃຈຂໍ້ມູນທີ່ : MacRumors , Apple

#iOS #iPhone @iPad #Mac #Apple #dekit_project

12 June 2017

ໂປຼແກຼມ SPSS ສຸດຍອດໂປຼແກຼມວິເຄາະຂໍ້ມູນ ( Version 21 )

ໂປຼແກຼມສໍາເລັດຮູບທາງສະຖິຕິ ( Statistical package ) ທີ່ເປັນໂປຼແກຼມໃຊ້ສໍາລັບການວິເຄາະຂໍ້ມູນທາງສະຖິຕິໂດຍກົງ ເຊິ່ງ SPSS ກໍ່ໂປຼແກຼມສໍາເລັດຮູບທີ່ນິຍົມກັນໃຊ້ຫຼາຍໃນການວິເຄາະຂໍ້ມູນຕ່າງໆ.

ໂປຼແກຼມ SPSS ແມ່ນຫຍັງ ?

ໂປຼແກຼມ SPSS ( Statistical Package for the Social Science ) ເຊິ່ງເປັນໂປຼແກຼມທີ່ມີປະສິດທິພາບສູງ ໃນດ້ານຂອງການວິເຄາະຂໍ້ມູນທາງສະຖິຕິ ແລະ ການຈັດການຂໍ້ມູນຕ່າງໆ ເຊິ່ງຜູ້ໃຊ້ສາມາດວິເຄາະຂໍ້ມູນໂດຍການໃຊ້ສະຖິຕິຕ່າງໆ ແລະ ສະແດງຜົນການວິເຄາະຂໍ້ມູນອອກມາໃນຮູບແບບຂອງຕາຕະລາງ ແລະ ຮູບແບບອື່ນໆອີກຫຼາກຫຼາຍໄດ້ທັງຮູບແບບ 2 ມິຕິ / 3 ມິຕິ.

ການໃຊ້ງານໂປຼແກຼມບໍ່ຊັບຊ້ອນປານໃດ ເໝາະສໍາລັບຜູ້ໃຊ້ທີ່ຕ້ອງການປະມວນຜົນຂໍ້ມູນທີ່ຖືກຕ້ອງ ແລະ ວ່ອງໄວ, ແຕ່ກໍ່ຍັງມີກຸ່ມຄົນຈໍານວນຫຼາຍທີ່ຍັງມີຄວາມຄິດທີ່ວ່າ "ການວິເຄາະຂໍ້ມູນດ້ວຍໂປຼແກຼມ SPSS ເປັນເລື່ອງທີ່ຍາກ (ຂ້ອຍກໍ່ວ່າຍາກ ຫະຫະ) ແລະ ຍັງຕ້ອງໄດ້ໃຊ້ຄວາມຮູ້ທາງດ້ານສະຖິຕິເປັນສ່ວນໃຫຍ່ " . ແຕ່ ເນື່ອງຈາກການໃຊ້ງານໂປຼແກຼມ SPSS ບໍ່ຈໍາເປັນຕ້ອງມີຄວາມມຮູ້ພື້ນຖານທາງສະຖິຕິ ແຕ່ຂໍໃຫ້ມີຄວາມຮູ້ພື້ນຖານກ່ຽວກັບການນໍາສະເໜີຂໍ້ມູນດ້ວຍສະຖິຕິໃນເບື່ອງຕົ້ນ ເຊັ່ນວ່າ : ຄວາມຖີ່ (Frequency), ເປີເຊັນ (Percentage), ຄ່າສະເລ່ຍ (Mean) ແລະ ຄ່າຜັນປ່ຽນມາດຕະຖານ (Standard Deviation) ເປັນຕົ້ນ. //ເດະ ! ກໍ່ຍັງຍາກຄືເກົ່າ ຫະຫະ

" ສໍາລັບວິທີການໃຊ້ງານ ແມ່ນໄປຮຽນຮູ້ເອົາເອງເນາະ ຂ້ອຍກະບໍ່ຮູ້ໃຊ້ຄືກັນ 😜 "

ມ໋ະ... ເຮົາມາໂຫລດໂປຼແກຼມ SPSS ໂດຍການກົດປຸ່ມ DOWNLOAD ເລີຍ